Luk 9 | KYG | STEP | Yesu'mo tuolofu'a vaya'mo ge'amo ne'afiya vaya'aife'mo ge hu'nige'a e'a mai'nageno'ae'mo hosu apaune vaya'aina ali'a hapafai'a apatalege kaita nehapausiya vaya'mo ali'a alagepa hu'a apatege hisayafe'mo himamu'amo alino apamiteno'ae'mo,

Luke 9

Yesu'a ge'amo ne'afiya vaya'aife'mo, umenitata hutapa Goti ge'amo aeta hakalo hiyo, huno hapa pai'niya gemae

(Mt 10:5-15; Mk 6:7-13)

1 Yesu'mo tuolofu'a vaya'mo ge'amo ne'afiya vaya'aife'mo ge hu'nige'a e'a mai'nageno'ae'mo hosu apaune vaya'aina ali'a hapafai'a apatalege kaita nehapausiya vaya'mo ali'a alagepa hu'a apatege hisayafe'mo himamu'amo alino apamiteno'ae'mo, 2 Goti'a yagaino ne'apateya kavafe'mo ava gemo aeta hakalo hutapa hapa paitetapa kaita hapau'niya vaya'aina alita alagepa hutapa apatemale apatemale hutapa umenitata hiyo. 3 Mago yatapimo o'alitapa afa'a viyo. Hayopa kayotapigi kutapigi ne'yatapigi monitapigi lole siotitapigi hutapa o'alitapa afa'a viyo. 4 Utapa haisaya nopi'mo ataletapa o'utapa ani nopi'mo maiyo. 5 Inagi ali'a falu fala hu'a olapatesaya taonifi'mo apakaefe'mo faigoko gemo hisiyafe'mo alagena kava'mo hutapa lapaiyalegati'mo mumusopamo alitapa kalo paetaletapa viyo, huno hapa paiteno alino apate'nige'a u'nae. 6 Muki haopalega umenitata hu'a taoni'afi taoni'afi'mo alagepa faigoko gemo ae'a hakalo hu'a hapa paige kaita hapau'niya vaya'mo ali'a alagepa hu'a apatege hu'a umenitata hu'nae.

Heloti'a Yesufe'mo ava gemo afi'niya gemae

(Mt 14:1-2; Mk 6:14-16)

7 Heloti'a yagaino ne'apateya vekamo'mo Yesu'a muki hu'niya kavafe'mo ava gemo afiteno'ae'mo lusi kava huno agesa afi'niye. Mago vaya'amogimo, Yoni'a fali'niyateti'mo halate he ti'niye, hu'a hu'nage'apae'mo mago vaya'amogimo, Ilaiya'a afole ai'niye, hu'a hu'nage'apae'mo 8 mago vaya'amogimo, akeya'vilaga vekamo Gotitegati gemo alinino eno aeno hakalo huno hapa nepaiya vekamo fali'niyateti'mo halate he ti'niye, hu'a hu'nae. 9 Heloti'a, Yoni'a lugo'amo ago he'na hatagau'na atale'nova'monanafa ava gemo ne'afuva vekamo ina lafe'mo ava gemo nehafi, huno huteno Yesu'mo agesiyafeke'mo mai'niye.

Yesu'a faefu tauseni'a vaya'aina ne'ya'mo alino apami'niya gemae

(Mt 14:13-21; Mk 6:30-44)

10 Apa vaya'mo halate Yesutegamo ai'a atagi ne'e'a muki hu'naya kavafe'mo ava gemo hu'a ha pai'nageno afiteno'ae'mo apavalelino uno Metasaita taoni haopalegamo apakai'apige'mo u'a mai'nae. 11 Asole vaya'mogimo afite'apae'mo Yesu'a akame hu'a e'a ava'yi hu'nageno'ae'mo alino falu fala huno apateteno Goti'a yagaino ne'apateya kavafe'mo ava gemo huno hapa paige kaita hapau'niya vaya'aina alino alagepa huno apatege huno mai'niye. 12 Yegemo lamino falegefe hu'nige'apae'mo tuolofu'a vaya'mogi Yesutegamo e'a, ka'me kotegamo eta mai'nona'mofe'mo muki vaya'mo alika apatege'a u'a ani haopalega hane'niya taonifati'e kotegati'e'mo ne'ya'apimo miya fai'a nete'a havaeyo, hu'a ha pai'nageno'ae'mo, 13 lapakaemo ne'ya'mo alitapa apamiyo, huno hapa pai'nige'apae'mo, faefu'a peleti maya'e lole noyamela'e'mo hane'nigi ne'ya'mo nesaya ya'mo uta miya failita esupiye, hu'a afi ge'nae. 14 Faefu tauseni'a agufa vaya'mo mai'nae. Agaemo ge'amo ne'afiya vaya'aife'mo, fifiti fifiti'a vaya'mo alita anupa hutapa apatete apatete hutetapa alita anupa hutapa, kahaule'mo maiyo, hutapa hapa paiyo, huno hapa pai'nige'a 15 ani gemo hu'a hapa pai'nage'apae'mo kahaule'mo mai'nae. 16 Agaemo faefu'a peleti maya'e lole noyamela'e'mo ali'neno koku'nategamo alino maku huno age'neno Gotife'mo hao ke heteno alino lo aeno akaya heteno ge'amo ne'afiya vaya'mo apami'nige'apae'mo alini u'e'a hu'a apami'nage'apae'mo 17 ne'a apamu hu'nae. Ne'a apamu hute'a atalaya atupa'amo ali'a tuolofu'a honafa yuvapafi'mo male'a havaite'nae.

Pita'a Yesufe'mo Kalaisi vekamo mai'nane, huno ha pai'niya gemae

(Mt 16:13-19; Mk 8:27-29)

18 Mago afina'mo Yesu'a agai'age'mo nunumu'mo nehige'apae'mo ge'amo ne'afiya vaya'mo magokepi lokae'a mai'nae. Mai'ne'apae'mo Yesu'a, vaya'mogimo, nagaefe'mo ina la'nae, hu'a nagi'nimo ne'ae, huno apafi ge'nige'apae'mo, 19 mago vaya'amogimo, Yoni'a ani'mo faleno ne'apateya vekamo mai'niye, hu'a huge mago vaya'amogimo, Ilaiya'a mai'niye, hu'a huge mago vaya'amogimo, mago akeya'vilaga vekamo Gotitegati gemo alinino eno aeno hakalo huno hapa nepaiya vekamo fali'niyateti'mo halate he ti'niye, hu'a huge nehae, hu'a ha pai'nageno'ae'mo 20 Yesu'a, ani gemo nehaya'monanafa lapakaemo ina la'nae, hutapa nagi'nimo ne'ae, huno loka huno apafi ge'nigeno'ae'mo Pita'a, Goti'a lekana paino kate'niya vekamo Kalaisi ne'mogamae, huno ha pai'nigeno 21 Yesu'a lokiya gemo huno'ae'mo, magoke vekae'mo mani gemo ha opaiyo, huno hapa pai'niye.

Yesu'a, falite'na halate he tiguve, huno hu'niya gemae

(Mt 16:20-28; Mk 8:30—9:1)

22 Huteno'ae'mo, Vemo Mafa'nemo'mo lusi kava huno agafu kisiya ya'mo aligiye. Vayatama vayanagi mono hu'a ne'apataya vaya'aite'mo yagai'a ne'apataya vayanagi ke'aepa gemo avo'mo kae'a ali'a apaya ne'malaya vayanagi hu'a apakame'ya amisage'a amagisageno faliteno lole'e mago'e afina'mo maiteno halate he tigiye, huno hapa paiteno 23 Yesu'a muki vaya'aife'mo, mago vekamo'a nakame hugefe'mo hu'nisiyana hau'niya kavafe'mo, ha'ao o'nahaiye, huno huteno muki afina'ae afina'ae'mo malipu yosa'amo alino kofilino nakame hino. 24 Ina lagimo ma mopafi'mo alagepa hu'a maige maige hu'a maisaya kavafe'mo hapau'nisige'a yagai'a ate'a mai'nisafige'a alagepa hu'a ne'maisaya kava'apimo alagi hano hugiya'monanafa ina lagimo nagaetefe'mo alagepa hu'a ne'maisaya kava'apimo atale'nisafige'a alagepa hu'a maisaya kava'apimo aligae. 25 Mago vekamo'a muki ma mopafi'mo hane'nisiya ya'amo alino hano huno ali'nisiyana alino ago'ya lagauge auneme'amo lageso huge hisiyana akamelegati mago'e ya'mo afa'a ali'nifiye. Ha'ao alagi o'ali'niye. 26 Ina lagimo nagae'e ge'nile'efe'mo apavagage nehisifigeno Vemo Mafa'nemo'a ha le konali ya'amo Afo'amotegati'mo ali'niya ha le konali ya'amo aliteno apaote enisole vaya'ai ha le konali ya'api'e enisole vaya'a'e'mo emineno'ae'mo apakaefe'mo avagage hugiye. 27 Lama gemo lapa nepauve, Manile he ti'a mai'naya vayapati'mo mago vaya'mo ofali'a afa'a mai'ne'apae'mo Goti'a yagaino apatesiya kava'mo afole aisige'a agegae.

Ge'amo ne'afiya vaya'mogi Yesu ha le konali ya'amo age'naya gemae

(Mt 17:1-13; Mk 9:2-13)

28 Magoke salemo utegeno Pita'agi Yoni'agi Yemisi'agi huno apavalelino nunumu hisiyafe'mo mago avefi'mo hai'niye. 29 Nunumu nehigeno'ae'mo aeto agufa augosamo alino ha male'nigeno kukena'alegati'mo alave alave'age'mo huteno yaveyave'ageke'mo hu'niye. 30 Lole vekala'mo akeya'vilaga vekala'mo Mosese'e Ilaiya'e'mo afole aite'ana 31 ha le konali ya'a'e'mo mai'ne'anae'mo Yulusalemu taonifi'mo uno falisiya kavafe'mo Yesugi'e'mo ge huge afige hu'ana mai'na'ae. 32 Pita'e anakae'e'mo apau mai'mai hu'nige'a apau'mo kale'ne'a apaupati'mo age'a ayake'a agayana Yesu ha le konali ya'amo'a aeno ha le'nige'a age'nae. Agete'a apakayana Yesu'e'mo magokepi he ti'ana mai'na'a vekala'e'mo mai'nage'a apake'nae. 33 Lole vekala'mo atale'ana ne'va'ageno'ae'mo Pita'a Yesufe'mo, Tisao, kanalenageta manile maigune. Lole'e mago'e yege no'mo kigune. Kagae no'mo kite Mosese no'mo kite Ilaiya no'mo kite huteta manile'mo maigune, huno ha pai'niya'monanafa na agufa gemo nehufi huno agesa o'afi'niye. 34 Ani gemo nehigeno'ae'mo mago hiya'mo'a yege aulagale'mo kino ati kae'nige'apae'mo hiyapi'mo mai'ne'apae'mo koli hu'nae. 35 Ani hiyapati'mo mago gemo huno'ae'mo, Nahau nayamopafi'mo nahau'niya mafa'ne'nimo mai'nigi ge'amo afiyo, huno nehige'apae'mo 36 agayana Yesu'a agai'age'mo mai'nige'a age'nae. Ani afinateti'mo age'naya kavafe'mo ava gemo hu'a hapa opai'nae.

Yesu'a mago mafa'nemo alino alagepa huno ate'niya gemae

(Mt 17:14-21; Mk 9:14-29)

37 Egamo avefati'mo emine ne'ege'apae'mo muki vaya'e'mo e'a fotu hu'nae. 38 Ani vayapati'mo mago vekamo'a, Tisao, kahao ke hovanagi, ago, magoke mafa'ne'nimo mai'niye. 39 Hosu aune vekamo'a atafau'nigeno kagegage huteno atete nehigeno avanumo'mo halo halo nehigeno amagino ateno ne'vigeno'ae'mo managi lami managa lami nehiye. 40 Nagaemo gekamo ne'afiya vaya'aife'mo, ani hosu aune vekamo alita hafaitalegeno vino, hu'na hapa pai'novana afa'a ali'a hafai'a atalesaya kava'mo afa'a osu'nae, huno ha pai'nigeno 41 Yesu'a, hemeni afina'mo mai'naya vaya'mogitapae, lapakesa afitapa fatago nosageno'ae'mo hosu lapaipa lapakesa hane'niya kavafe'mo lusi kava huno alaga ne'nahaegi na magi afina'mo lapakae'e'mo mago'e hu'na lokae'na maime maime ne'visugetapae'mo afitapa alagepa hugae. Mafa'nekamo avalelika eno, huno ha pai'nigeno 42 avalelino ne'egeno'ae'mo hosu aune vekamo'a alino ago'ya faino mopafi'mo atale'nigeno atete huno mai'niye. Yesu'a hosu aune vekamo alino hafaino ataleteno mafa'ne'amo alino alagepa huno ateteno afo'amo'mo avaleno ami'niye. 43 Muki vaya'mogi Goti ayamufa'a'e lokiya'a'e'mo agete'apae'mo hapau ai'nae. Inagi agaemo ge'amo ne'afiya vaya'aife'mo, 44 mani hemenimo hisuva gemo afitapa alagepa hu'netapa alita lapaipafi'mo maleyo. Mago vaya'mogi Vemo Mafa'nemo avaleli u'a hosu vaya'ai apayapi'mo ategae, huno hapa pai'niyana ani gemo afi'a alagepa osu'nae. 45 Afi'a aeto osisayafe'mo huno fala kino hu'nige'apae'mo loka hu'a afi gesayafe'mo hu'nayana koli hute'a ge hu'a afi oke'nae.

Lagaepati'mo ina la'mo hogote vekamo mai'niye, hu'a hute'a ge huge afige hu'naya gemae

(Mt 18:1-5; Mk 9:33-37)

46 Ina la'mo lagaepati'mo aeno laga se'niya vekamo mai'niye, hu'a hute'a ge vai'nae. 47 Yesu'a apaipafi'mo apakesa ne'afiya apakesa apaketeno'ae'mo mago aise mafa'nemo avalelino eno haupi'mo ateno mai'niye. 48 Apakaefe'mo, ina lagimo nagaetefe'mo mani magufa aise mafa'nemo ali'a falu fala hu'a ne'atesafi ani kava hu'a ali'a falu fala hu'a ne'natae. Ina lagimo ali'a falu fala hu'a ne'natafi ani kava hu'a alino nate'nige'na emi'ne'nova veka'e'mo ali'a falu fala hu'a ne'atae. Lapakaepati'mo mago henaga mai'nisiya vekamo'a hogote vekamo maigiye, huno hapa pai'niye. 49 Yoni'a, age'nonana mago vekamo'a kagikaleti'mo hosu apaune vaya'mo alino hapafaino apatale'nigeta age'none. Agaemo ani kava'mo nehiyana lakame huno umenitata nosiya'mofe'mo ani kava'mo osuka afa'a ataleka maiyo, huta ha pai'none, huno ha pai'nigeno 50 Yesu'a, hutapa atafautapa o'ateyo. Mago vekamo kametimo o'mai'nisiyana lao vekamo mai'niye, huno ha pai'niye.

Samaliya kotega vaya'mogi Yesu'mo ali'a falu fala hu'a o'ate'naya gemae

51 Goti'a Yesu'mo koku'napi avalelino uno haisiya afina'mo ago eno hogo hu'nigeno'ae'mo Yesu'a lokiya vaino agesa afino'ae'mo, Yulusalemu taonifi'mo haiguve, huno agesa afiteno'ae'mo 52 mago apa vaya'mo alino apate'nige'apae'mo Samaliya vaya'ai taonifi'mo u'a alo hu'a atesayafe'mo u'a hogote'nae. 53 U'naya'monanafa Samaliya vaya'mogi, Yulusalemu kotegamo ugefe nehiya'mofe'mo lagaemo alita falu fala huta o'ategaune, hu'a hapa pai'nage'apae'mo atale'a halate ai'a atagi ne'a e'nae. 54 Ge'amo ne'afi'a vekala'mo Yemisi'e Yoni'e'mo ani gemo afite'anae'mo, Ala kava nene, Ilaiya'a hogoteno hu'niya agufa kava'mo huta'a koku'napife'mo atae'mo ge hisu'ageno emineno leno apasaga lisiyafe'mo kahau'nifiye, hu'ana afi ge'na'ageno 55 aino afe le'neno'ae'mo, na agufa la'aunela'ame'mo mai'nifi, hutana o'age'na'ae. Vemo Mafa'nemo'mo vaya'mo apamagisiyafe'mo emi'no'me'nifa vaya'ai apakufamo alino katino apatesiyafe'mo emine'niye, huno ge hanau'niye. 56 Atale'a alu taonifi'mo u'nae.

Yesu'a akame hu'a visaya kavafe'mo hu'niya gemae

(Mt 8:19-22)

57 Kate'mo ne'vageno'ae'mo mago vekamo'a eno Yesufe'mo, muki visana kotegamo kakame hu'na umenitata huguve, huno ha pai'nigeno 58 Yesu'a, yagagafa'e namamogi'e'mo apano'mo hane'niya'monanafa Vemo Mafa'nemo'a havaesiya no'mo ohane'niye, huno ha pai'niye. 59 Alu vekae'mo, eka nakame huvo, huno ha pai'nigeno'ae'mo, Ala kava nene, he kanalene huka huge'nao hogote'na afo'nimo'mo u'na ali'na ki'na atete'nae, huno ha pai'nigeno'ae'mo, 60 afa ato, fali kavategamo ne'maiya vaya'mogimo falisaya vaya'apimo ali'a ki'a apatesaya kava'mo hane'niye. Kagaemo apatalekuka Goti'a yagaino ne'apateya kavafe'mo ava gemo aeka hakalo huka hapa paiyo, huno ha pai'niye. 61 Alu vekamo'a, Ala kava nene, kakame hu'na umenitata hisuvafe'mo hogote'na u'na no'nifi'mo mai'naya vaya'mo naya'mo apami'na ali'na falu fala hu'na apatete'na apatale'na visuvafe'mo he kanalene huka huge'nao, huno ha pai'nigeno 62 Yesu'a, mago vekamo'a pulumakamo'mo ai'yumo aisiyafe'mo aeni kayote'mo atafau'neno'ae'mo aino afe leno akamelegamo ne'agesiya vekamo'mo Goti'a yagaino ne'apateya kegiyafi'mo afa'a ohaigiye, huno ha pai'niye.